Олмо: Сакам да ги освојам сите можни титули со Барселона

Дани Олмо (26) стана нов играч на Барселона во еден од најочекуваните трансфери ова лето.

Поранешниот играч на Динамо, а сега на РБ Лајпциг потпиша договор до 2030 година со каталонскиот клуб. РБ Лајпциг ќе добие 55 милиони евра и бонуси во висина од седум милиони евра. Барселона во договорот вгради клаузула за обештетување од 500 милиони евра.

Во летото 2014 година, како 16-годишник, Олмо без отштета дојде од Барселона во Динамо. Пет и пол години подоцна, зимата 2020 година, Динамо го продаде на Лајпциг за 29 милиони евра. Дополнително, шампионот на Хрватска во договорот вклучи и клаузула според која и тој има право на 20 отсто од добивката што ќе ја има германскиот клуб во случај на продажба на Олмо.

Лајпциг го продаде Олмо на Барселона за фиксна сума од 55 милиони евра. Значи, и да не се реализираат бонусите, профитот на Лајпциг во однос на тоа што му го плати на Динамо е 26 милиони евра. Од таа сума 20 отсто или 5,2 милиони евра отпаѓа на Динамо. Олмо сега ја даде својата прва изјава по неговото враќање во Барса во интервју за клупската телевизија:

„Дојдов да победувам и да ги освојам сите можни титули. Ние сме Барса и треба да се бориме за сите титули. Пресреќен сум, бидејќи ми се оствари сонот. Мило ми е што се вратив дома, кај моето семејство, во мојот тим -соиграчите од репрезентацијата... Сега почнува новиот период, едвај чекам да започне сезоната.“