Ол-стар натпреварот во НБА во Кливленд беше посебен настан, а Лука Дончиќ ќе го памети долго, и тоа по средбата со Мајкл Џордан.
На полувремето од натпреварот беа прогласени 75-те најдобри НБА играчи во историјата, од кои повеќето беа присутни. Меѓу нив секако беше и Мајкл Џордан, најдобриот кошаркар на сите времиња.
Џордан се прикраде до суперѕвездата на Далас Маверикс, Лука Дончиќ, и срдечно го поздрави, по што разговараа, а Словенецот едноставно не можеше да поверува дека популарниот Мистер Ер го познава и му го знае името.
„Беше неверојатно. Не знам како да го објаснам тој момент. Мајкл Џордан знае кој сум јас, ми го знае името, тоа е нешто големо. Тоа беше неверојатен момент“, изјави Дончиќ на прес-конференција по натпреварот на Ол-стар.
Иако сезонава имаше доста проблеми со повредите, Дончиќ во просек има речиси трипл-дабл со 27,5 поени, 9,2 скока и 9 асистенции по натпревар.