Арнолд Шварценегер, холивудска легенда и поранешен Мистер Универзум и гувернер на Калифорнија, се враќа во форма и нуди совети како вие да го направите истото.
Арни е познат по тоа дека секогаш е внимателен и грижлив кон своите фанови и е редовен корисник на онлајн платформата Reddit каде објавува содржини и коментари под корисничкото име u/GovSchwarzenegger.
Омилени теми на форумот му се политика и филм, но токму неговите мудри мисли и совети поврзани со неговата прва љубов – фитнес и бодибилдинг – е она што инспирира многумина.
За бодибилдерите, Арни е бог, па замислете како е да добиеш личен совет од вистинска легенда во твојот спорт.
Еден корисник на Reddit кој го фатила депресија и немал волја да вежба, побара совет од Шварценегер како да се мотивира да му се врати расположението за вежбање.
Не само што Шварценегер му одговори, туку темата толку заживеа што стана извор на позитивни вибрации на целата платформа.
Ова е одговорот на „Терминатор“:
„Нема да бидам строг со тебе. Те молам не биди ни ти строг со себе. Сите поминувме низ предизвици, низ неуспеси. Понекогаш животот е како вежбање. Клучно е да станеш. Раздвижи се малку. Стани од кревет и излези на прошетка или направи склекови. Само направи нешто. Чекор по чекор, се надевам дека ќе се чувствуваш подобро и ќе се вратиш во теретана. Но, немој да се прекоруваш, бидејќи тоа е бескорисно. Нема да те доближи до теретаната. И не се плаши да побараш помош. Среќно.“
Корисникот го прифати советот и се заблагодари за охрабрувањето и полека, полека се врати на вежбање. Арни дополнително го окуражи и му рече дека се гордее со него.