Производители на смартфони во последните години го бараат идеалното решение со кое ќе можат да искористат максимум од просторот и ќе имаат што поголем екран, без да ја скратат неговата функционалност со вметнување на селфи камера на предниот дел. Изгледа дека Oppo најде начин кој претставува одговор на овој проблем.
Решението на Oppo е прилично едноставно – невидлива камера која е скриена под дисплејот. Така, екранот на смартфонот ќе го зафаќа целиот преден дел.
Кинеската технолошка компанија прикажа како ќе изгледа нејзината најнова иновација. Во видеото објавено на Twitter можеме да видиме дека новиот телефон на Oppo нема никакви пресеци, дупки и останати механизми за сместување на селфи камерата. Екранот има можност за прикажување на непрекината слика од раб до раб, а камерата е сместена под него.
„За оние кои бараат совршено доживување на екранот, подгответе се да бидете воодушевени. Имате прилика први да ја видите нашата нова технологија за селфи камера“, пишуваат од Oppo.
Минатиот месец технолошкиот експерт Бен Гескин прв најави дека Oppo ќе претстави смартфон со скриена камера и како што се покажа, неговите предвидувања се остварија.
Уште не е познато кога ќе пристигне на пазарот смартфонот со оваа нова технологија, но од Oppo најавуваат дека нивните љубители нема да чекаат многу долго.
