Советот на министри за финансии на ЕУ одржа состанок на кој требаше да биде усвоена новата финансиска помош за Украина. Сепак, тој не беше усвоен поради ветото на Унгарија.
Меѓу другото, министрите разговарале за владеењето на правото во Унгарија, средствата од фондовите на ЕУ кои припаѓаат на оваа земја, усвојувањето на глобалниот минимален данок и финансиската помош за Украина.
„Министрите за финансии не можеа да се договорат за ниту една работа. Донесувањето одлука за овие четири прашања беше пролонгирана до понатамошно известување“, пишува 24.hu.
Исто така, се наведува дека министерот за финансии Михали Варга бил тој што ставил вето на овие одлуки.
„Причината за ова е што унгарската влада не поддржува заедничко задолжување. Во исто време, тоа не значи дека министрите не можат да се договорат за ова подоцна или дека не може да продолжи без Унгарија“, пишува унгарскиот весник.
Чешкиот министер за финансии по средбата изјави дека министрите нема да бидат обесхрабрени по ваквата одлука на Унгарија.
„Не бевме во можност да го усвоиме пакетот како целина, но нема да бидеме обесхрабрени. Нашата амбиција останува да започнеме со исплати за Украина во јануари“, рече министерот.
Како што пишува магазинот Politico, министрите за финансии најверојатно во наредните денови ќе закажат нов самит, а се проценува дека тој би можел да се одржи на 12 декември. Исто така, една од опциите е прашањето за финансиската помош за Украина да биде разгледано од шефовите на влади на земјите од ЕУ на состанок во средината на декември.
