Унгарскиот премиер Виктор Орбан денеска изјави дека претстојните преговори меѓу САД и Русија се за ставање крај на војната во Украина, велејќи дека тоа го сака Унгарија. „Алелуја, ова е она што го сакавме. Ова е она на што се обложуваме“.
„На ова се заснова нашата унгарска стратегија: војната не смее да трае, новиот американски претседател (Доналд Трамп) ќе биде тука, а бидејќи Европејците се неспособни и парализирани, тој ќе го пресече Гордиевиот јазол и ќе направи мир“, изјави Орбан за јавниот сервис, пренесе MTI.
Унгарскиот премиер посочи дека санкциите на ЕУ против Русија секоја година ја чинат Унгарија 6,5 милијарди евра, вкупно 20 милијарди евра.
„Со новиот американски претседател и мир, Русија ќе се реинтегрира во светската економија, што ќе даде огромен поттик на унгарската економија“, рече Орбан.
Орбан додаде дека брзи промени се случуваат во областите миграција, зелени политики, родови прашања, семејство и христијанство, но дека Европа „се спротивставува“.
Како што рече, Унгарија секогаш размислувала во склад со актуелните позиции на американскиот претседател Доналд Трамп, пренесува Танјуг.
