Скопје, 15 март 2019 (МИА) – Кај 42-годишен жител од гостиварското село Чајле пронајдени се оружје и куршуми. При претресот во неговиот дом пронајдени се пиштол „глок“ калибар 9 милиметри, што го поседувал со дозвола, ловечки карабин „хајнел“ калибар 30-06 со дозвола на друго име и вкупно 136 куршуми од различни калибри.
Непосредно пред тоа, во дворот од соседната куќа, пронајдени се два пиштоли „ЦЗ“ калибар 6,35 милиметри, револвер „смит и весон“ калибар 45 милиметри, нож со футрола, пет куршуми и батериска лампа со полнач, кои непознато лице ги фрлило од прозорец од куќата на приведениот Р.М.
Претресот е извршен вчера во 06:45 часот со судска наредба.
Се работи на целосно расчистување на случајот.
