Со години се бори со депресија и се плаши од јавни настапи, а сега 23-годишната тенисерка Наоми Осака се повлече од Ролан Гарос откако не сакаше да одржи прес-конференција по победата во првото коло. Поради тоа е казнета со 15.000 долари.
Пред почетокот на турнирот Осака рече дека не сака да разговара со медиумите поради ментални проблеми, но оттаму немаа разбирање за неа па покрај парична казна на тенисерката ѝ се заканија со исфрлање од турнирот.
Освен таа закана, на Осака ѝ порачаа дека во случај ако продолжи со ваков третман кон медиумите ќе биде суспендирана од останатите најголеми турнири.
По заминувањето, Осака на Twitter напиша дека може да земе подолга пауза од настапи и призна дека веќе три години се бори со депресија и анксиозност, што ѝ создава големи проблеми кога мора да зборува јавно пред луѓе.
Им се извини на новинарите и додаде дека за тие проблеми комуницирала со организаторите на Ролан Гарос. Изгледа дека не е најдено заемно решение, па тенисерката се откажа од натпреварувањето во Париз.
Поддршка доби од колешката Серена Вилијамс.
„Имаме различни мислења, сите сме различни. Никој не е ист. Јас малку покрупна, некои луѓе се поситни, различни сме. Мора да ја оставите Наоми да го реши ова на свој начин, како што таа сака. Ако мисли дека вака е најдобро, оставете ја. Сочувствувам со неа и би сакала да ја прегрнам“, порача легендарната Американка.