Престојот на астронаутите во вселената може да го оштети нивниот мозок, покажаа најновите резултати од новото истражување чија цел е да даде одговор на прашањата за долгорочните ризици од идните вселенски патувања.
Крвните тестови на вселенските патници укажуваат на благо, но трајно оштетување на мозокот и негово побрзо стареење по нивното враќање на Земјата, тврдат научници од минхенскиот универзитет ЛМУ. Студијата за тоа е објавена во Jama Neurology.
Истражувањето е спроведено само неколку дена пред актерот Вилијам Шатнер да стане еден од низата непрофесионални астронаут кои отпатуваа во вселената, а воедно и највозрасниот вселенски турист.
Иако вселенскиот туризам ќе стане луксузен бизнис наменет за богаташите, сепак научниците имаат предупредување за потенцијално оштетување на мозокот кога станува збор подолг престој во вселената, но не и на неколку минути колку што во бестежинска состојба минуваа корисниците на новите вселенски компании како Blue Origin со која отпатува и Шатнер.
Истражувачите веруваат дека една од можните причини за оштетување на мозокот во текот на патување во вселената е токму бестежинската состојба која пречи на протокот на крв од подрачјето на главата, а за што се верува дека со текот на времето резултира со зголемување на притисокот во цереброспиналната течност.
И претходните студии покажаа дека подлабоките патувања во вселената не само што влијаат на намалување на мускулната маса и коските, туку и на мозочни промени кај астронаутите, но не се знаеше дали тој процес е штетен.
За да го дознаат тоа, доктори од ЛМУ во соработка со шведски и руски колеги ја проучуваа крвта на петмина руски космонаути кои на Меѓународната вселенска станица минале пет и пол месеци.
