Организаторите на Оскарите одлучија оваа година црвениот килим да го заменат со тепих во боја на шампањ.
Како што пренесоа странските медиуми, во средата пред театарот Долби во Холивуд работниците кои работат на подготовките за овогодинешното доделување на Оскарите го одвиткале тепихот во боја на шампањ, додека водителот на 95-те Оскари, Џими Кимел, зборувал со новинарите.
„Мислам дека одлуката наместо црвен да имаме килим со шампањ покажува колку сме сигурни дека нема да се пролее крв“, се пошегува Кимел.
Одлуката за промена на бојата ја донеле креативните консултанти Лиза Лав, долгогодишна соработничка на Vogue, и Раул Авила, креативен директор на гламурозната Мет Гала во Њујорк.
Годинава килимот ќе биде делумно покриен за да се заштитат ѕвездите и камерите од временските неприлики.
Кои се најголемите фаворити за Оскар според обложувалниците?
Црвениот килим на Оскарите датира од 1961 година, кога се одржа 33-тото доделување на Оскарите во Civic Auditorium во Санта Моника.
Пошироката јавност немаше можност да го види црвениот килим во полн сјај на телевизија сè до 1966 година, кога за првпат наградите Оскар беа емитувани во боја.
За потсетување, годинешното доделување на Оскарите ќе започне во понеделник во 2 часот по европско време (т.е. во 20 часот по локално време во Лос Анџелес).
