„Стотина ученички киднапирани од интернат на северозападот на Нигерија се ослободени утринава и се наоѓаат во просториите на владата на Замфара“, изјави гувернерот на таа област.
„Среќен сум што можам да кажам дека девојчињата се ослободени, туку што пристигнаа во зградата на Владата и се во добра состојба“, рече гувернерот Бело Матавале за AFP.
Минатиот петок беа киднапирани вкупно 279 средношколки и сите се ослободени.
Властите првин соопштија дека недостигаат 317 ученички по напад на вооружени луѓе во интернат во државата Замфара. Станува збор за четврти напад за помалку од три месеци на училиште на северозападот на Нигерија, каде во последните години криминални групи крадат стока и киднапираат луѓе, барајќи откуп за нив.
Властите на Замфара имаат обичај да преговараат со криминалците и во последните години постигнуваат договор за амнестија во замена на положување на оружјето.
Во декември минатата година беа ослободени 344 момчиња кои криминалците ги киднапираа од интернат.
