Обожавателите на поп-ѕвездата Бритни Спирс бараат пејачката повторно да добие контрола врз нејзините лични и бизнис работи.
Кариерата на „Принцезата на поп-музиката“ е во рацете на законски старатели, откако таа имаше прилично јавна криза на менталното здравје пред 12 години.
Спирс почна да се однесува неконтролирано во 2007 година, по разводот од Кевин Федерлајн во кој го изгуби старателството врз нивните две деца. Голем дел од нејзините наводни „нервни сломови“ се случија пред очите на медиумската јавност: Бритни се најде на насловните страници на таблоидите кога си ја избричи косата и беше фотографирана како удира со чадор по автомобилот на папарацо фотограф. Поп-пејачката имаше и неколку обиди за почнување психотерапија во установа.
Деталите од договорот за законско старателство врз полнолетно лице никогаш не беа објавени за јавноста, но познато е дека Спирс има ограничувања на автономијата.
Демонстрантите на кампањата #FreeBritney (#ОслободетеЈаБритни) протестираа денеска пред судот во Лос Анџелес каде преку интернет видеоврска Спирс (38) беше сослушана во врска со иднината на нејзината финансиска иднина, личниот живот и менталното здравје. Фановите на пејачката и претходно изразувале загриженост за нејзината добросостојба и слобода.
Бритни Спирс нема контрола врз нејзините финансии и кариерни одлуки од 2008 година наваму, согласно договор што во законите на САД се нарекува „conservatorship“. Според овој договор, таткото и адвокатот на Спирс менаџираа со нејзините финансии и личен живот, вклучувајќи забрана за посетители и комуникација со докторите во врска со нејзината терапија.
Минатиот септември татко ѝ, Џејми Спирс, се повлече од оваа улога, наведувајќи здравствени причини. Судија потоа ја назначи Џоди Монтгомери на неговото место, како „менаџер на нега“ за Бритни Спирс.
