Двајцата основачи на Instagram, Кевин Систром и Мајк Кригер, најавија дека ја напуштаат компанијата која во моментов е во сопственост на Facebook. Тие рекоа дека си заминуваат од компанијата за одново да се посветат на креативноста и да ја тестираат нивната љубопитност.
Систром и Кригер не открија зошто си заминуваат од позициите на извршен директор и технички директор на Instagram, но одредени медиуми шпекулираат дека тие ја напуштаат компанијата поради тензиите со основачот на Facebook, Марк Закерберг.
Bloomberg пишува дека двајцата основачи ја напуштаат работата во компанијата-социјална мрежа поради постојаните несогласувања и растечки тензии околу насоката во која оди Instagram откако во 2012 година компанијата беше купена од страна на Facebook.
„Најпрво малку ќе одмориме од работа, па потоа одново ќе се посветиме на креативноста по која сме познати. Сакаме повторно да ја тестираме нашата љубопитност, овојпат можеби и во некоја друга гранка. Благодарни сме за изминатите осум години во Instagram и шестте години заедно со екипата на Facebook“, рече Кевин Систром.
Дуото ќе си замине од компанијата набрзо, а остатокот од раководството беше известен за нивото заминување уште вчера.
Instagram има повеќе од 1 милијарда активни корисници секој месец, а нивниот број вртоглаво се зголеми откако компанијата реши да воведе нови карактеристики на апликацијата, како текстуални пораки, кратки видеа и Live преноси.