Основачот и сопственик на Twitter, Џек Дорси најави дека ќе донира милијарда долари за борбата против пандемијата на COVID-19.
Дорси на Twitter објасни дека оваа сума претставува 28% од неговото богатство, а за да обезбеди милијарда долари постепено ќе ги продава акциите на неговата втора компанија Square, специјализирана за дигитално плаќање.
Парите ќе бидат насочени како донации преку фондацијата Start Small.
По пандемијата парите ќе бидат насочени за здравјето и образованието на дeвoјчињата како и за универзални приходи, наведе Дорси чие богатство Forbes го оцени на 3,3 милијарди долари и додаде дека во овие две области гледа потенцијални решенија за проблемите со кои светот се соочува.
Универзалниот приход е нов инструмент на социјална политика кој подразбира сите жители на некоја земја да добијат одредена сума пари, без оглед на нивната имотна состојба.
„Зошто сега? Бидејќи потребите се итни и сакам да ги видам ефектите во текот на мојот живот. Се надевам дека ова ќе ги инспирира и другите. Животот е премногу краток, правиме сè што можеме за сега да им помогнеме на луѓето“, порача Дорси.
Основачот на Facebook, Марк Закерберг и неговата сопруга Присила Чен донираа 30 милиони долари за истражување за лекување од коронавирусот.
Шефот на Amazon, Џеф Безос донираше 100 милиони долари за сиромашните луѓе во САД, а шефот на Apple, Тим Кук во март објави дека ќе донира медицинска опрема за Италија, која е најсилно погодена европска земја од вирусот, пренесе BBC.