Конечно вистинско засилување за кочанчани, искусниот голгетер и поранешен репрезентативец Ацо Стојков потпиша со повратникот во второлигашката конкуренција.
Осогово се чини го донесе најголемото засилување по завршувањето на летниот преоден рок. И тоа токму во нападот каде тимот се мачи со најважното, постигнувањето на голови.
Искусниот голгетер е веќе во Кочани каде доаѓа како слободен играч откако не го продолжи договорот со Академија Пандев чиј член беше минатата сезона. Иако 36 годишен, Стојков се очекува да го размрда заспаниот и неискусен напад на Осогово кој тотално потфрли во првите три кола од новото првенство успевајќи да постигне само еден гол.
Кочанчани одамна немале толку звучно име во својот миленик, Стојков во својата богата кариера играше за младинците на Интер, потоа Специја, Кастел ди Сангро, ФиделисАндрија, Гурњик, Ла Лувр, Партизан, Дебрецен, Њиреѓхаза, Аарау, Зоб Ахан, Ботошани, Скндербеу, Работнички, Вардар и Академија Пандев. Тоа се клубови од Италија, Полска, Белгија, Србија, Унгарија, Швајцарија, Иран, Романија, Албанија и Македонија.
Стојков порано беше и стандарден репрезентативец играјќи 42 натпревара со 5 постигнати голови. Првиот гол во новиот дрес ќе го брка в недела во Пехчево кога Осогово му гостува на Кит-Го.