Вечерва и утре ќе заврши квалификацискиот циклус за пласман на Европското првенство во 2024 година. За пласман на завршниот турнир, преку квалификациите, останаа уште четири слободни места. Три места ќе бидат пополнети вечерва, а едно во вторник.
Понеделник носи три директни пресметки за пласман.
Италија направи голем чекор кон ЕУРО со убедливата победа над Македонија со 5:2 во петокот. Доволен ѝ е бод против Украина во Леверкузен за да се пласира на завршницата.
Проширувањето на бројот на учесници на ЕУРО може да ѝ овозможи на Молдавија да испише историја. Молдавците имаат само две победи во овој циклус, но и само еден пораз, па им треба само уште еден триумф за да се најдат на местото за кое веројатно не ни сонувале.
Доколку успеат да ги шокираат Чесите во Оломоуц, ќе ѝ се приклучат на албанската селекција во Германија.
На Чесите им е доволен и еден бод за потврда на пласманот на ЕУРО.
Уште една селекција од истокот има шанса да избори неочекуван пласман. На Казахстанците им треба чудо во Љубљана. Словенците со нерешен резултат по пауза од 24 години ќе се пласираат на завршниот турнир.
Вторник ни носи меч за „да се биде или не“, а главната улога ја имаат Хрватите. „Ватрените“ се на чекор до ЕУРО, а за да се најдат таму треба да ја победат Ерменија.
Меѓутоа, доколку Хрватите подлегнат на притисокот во Загреб, Велс би можел да им го одземе второто место.
Сепак, добрата вест за Хрватите е што Велшаните ги чека најдобриот тим во групата, Турција.
Инаку, од осамостојувањето во 1992 година, Хрватска пропушти само едно Европско првенство, она во Белгија и Холандија во 2000 година кога во квалификациите беше во група токму со Македонија и одигра 1:1 во Скопје.
