Свет

Останки од „вампир“ пронајдени на детски гробишта во Италија

13. октомври 2018 - 15:06 | К.З.

Почивалиште на „вампир“ беше пронајдено на територија во Италија која им припаѓала на древните Римјани, што укажува на тоа дека оваа цивилизација одржувала ритуали со кои, според археолозите, се обидувале да ги спречат закопаните трупови да се вратат од мртвите.

Телото на 10-годишно дете од засега непознат пол беше пронајдено закопано по принципот на овој древен ритуал, со камен во устата, што археолозите тврдат дека е практика која Римјаните ја користеле за да ги спречат мртвите повторно да оживеат.

Локалците го именуваа како „Вампирот од Луњано“, а доказите собрани од коските-останки сугерираат дека детето било болно од маларија во времето кога умрело.

„Никогаш немам видено нешто слично. Истовремено е морничаво и многу чудно“, вели професорот Дејвид Сорен, археолог на Универзитетот во Аризона.

Овие останки се последното невообичаено откритие кое беше пронајдено во Гробницата за деца, наоѓалиште во кое се закопани телата да десетици деца и каде може да се најдат докази за користење црна магија, древни обреди и ритуали.

Останките веројатно датираат од 5 век кога вирусот маларија се ширел низ Италија и ги покосувал локалните жители, меѓу кои децата и новороденчињата биле најпогодени поради нивното кревко здравје. Токму на местото наречено Гробница за деца се закопани децата на семејствата кои живееле на оваа територија.

Според археолозите, Римјаните им ставале камења во устата на закопаните деца поради страв дека тие некогаш можат да се вратат од мртвите и да ја прошират заразата. Бидејќи древните Римјани сметале дека заразата може да се прошири преку каснување, тие ги сметале овие деца за вампири и им забивале камен во устата за да им го попречат патот на нивните заби да стигнат до жртвата.

Коментирај