Најмалку осум лица се прободени со остар предмет во напад што се случил во градот Ветланд во јужниот дел на Шведска, пренесуваат локалните медиуми.
Според првичните информации од тамошните медиуми, наводно станува збор за терористички напад.
Според шведскиот јавен сервис SVT, полицијата на станицата Бангоршгатан, во центарот на Ветланд, околу 15 часот по локално време добила повик кога било наведено дека неколку лица биле нападнати со секира, но подоцна се востановило дека нападот бил со нож.
Полицијата соопшти дека момче на околу 20-годишна возраст почнало да ги напаѓа со нож луѓето околу себе околу 15 часот, по што безбедносните сили отвориле оган и го раниле во нога. Напаѓачот е пренесен во болница. Некои од жртвите се полесно, а некои се потешко повредени.
Мотивот за нападот сѐ уште не е познат, но полицијата засега го третира како терористички. Моментно ситуацијата е под контрола.
