При престрелка во една куќа во Тексас осуммина се убиени, а двајца се ранети, соопштуваат локалните власти од северниот дел на оваа сојузна американска држава.
До пукањето дошло во недела навечер во градот Плано, кој се наоѓа на околу 30 километри североисточно од Далас, пренесува „Асошиејтед прес“.
Портпаролот на градската полиција, Дејвид Тајли, изјави дека полицијата најпрво одговорила на пријавата за пукање.
Кога првиот полицаец пристигнал на местото на настанот, влегол во куќата и му се спротивставил на напаѓачот, а потоа пукал во него и го усмртил.
Уште две лица се ранети во престрелката, а нивната здравствена состојба сè уште не е позната.
Имињата на жртвите и на напаѓачот сè уште не се познати. Единствено се знае дека сите загинати се возрасни.