Фудбалската федерација на Македонија го заврши својот дел од реконструкцијата на стадионот „Гоце Делчев“ во Прилеп и ѝ го предаде на општината за понатамошно уредување.
Претставници на ФФМ извршија примопредавање со Општина Прилеп после целосното завршување на инфраструктурните работи на стадионот „Гоце Делчев” кои беа во надлежност на ФФМ. Според договорот, сега стадионот е целосно во надлежност на Општина Прилеп.
ФФМ со средства од „Хет-трик” програмата на УЕФА го финансираше поставувањето на целосно нова тревна подлога (тревни бусени) со модерен дренажен и систем за наводнување, а исто така, многу значајно е тоа што се постави и целосно ново рефлекторско осветлување и сега на стадионот има можност да се одигруваат и натпревари под рефлектори. Функционирањето на рефлекторите беше тестирано од страна на инвеститорите и надзорот, и оценката е дека ги исполнуваат критериумите за одигрување на вечерни натпревари.
Во договорот со Општина Прилеп стои дека општината треба да изгради посебна трафостаница за користење на новото осветлување на стадионот, а љубителите на фудбалот се надеваат дека во многу скоро време општината ќе го заврши својот дел од работите поврзани со трибините и потрибинскиот простор и конечно стадионот ќе го добие својот вистински фудбалски лик.
Овој стадион го користи фудбалскиот клуб Победа, член на втората лига Исток, кој откако ќе се доврши реконструкцијата ќе може да игра и ноќни натпревари. Моментално услови за ноќни натпревари имаат само Работнички и Вардар на „Тоше Проески“ во Скопје, но не ги користат, а има и Брегалница на „Градски“ во Штип која од лани континуирано игра натпревари во вечерните термини овозможувајќи им пријатна атмосфера и на играчите и на публиката. Се очекува наскоро и „Под Тумбе Кафе“ стадионот на Пелистер во Битола исто така да добие услови за ноќни натпревари.
Фото: ФФМ