Легендарниот украински фудбалер Игор Беланов е еден од најпознатите спортисти во историјата на таа земја, а сега во тешките времиња го покажа својот патриотизам.
Беланов, кој сега има 61 година, стекна светска слава играјќи за киевски Динамо од 1985 до 1989 година, а круна на кариерата беше освојувањето на Златната топка што му ја додели France Football во 1986 година.
По завршувањето на кариерата остана во родниот град Одеса, а моментално е функционер на Фудбалскиот сојуз на Украина.
Кога избувна војната во Украина, тој престојуваше во Одеса и често ги посетуваше војниците за да ги поддржи во војната против рускиот агресор.
На најновата фотографија која беше објавена отиде чекор понатаму и се сликаше во воена униформа со пушка во ров во близина на Одеса и со тоа ги воодушеви своите сонародници.
Покрај Динамо, настапуваше и за СКА и Черноморец од родната Одеса, како и во Германија за Борусија од Менхенгладбах и за Ајнтрахт од Брауншвајг. Кариерата ја заврши во 1997 година во дресот на Металурх од Мариупол.
Беше репрезентативец на СССР за кој одигра 33 напревари и постигна 8 гола. На Мундијалот 1986 во Мексико ѝ даде хет-трик на Белгија, но дури ни тоа не беше доволно за Советите да го минат осминафиналето бидејќи загубија со 3:4 на продолженија. Две години подоцна на ЕУРО 1988 во Западна Германија стигна до финалето каде загуби со 2:0 од златната генерација на Холандија со Гулит, Ван Бастен и Рајкард.
