Турција поднесе официјална апликација за приклучување кон БРИКС, соопшти Кремљ.
Помошникот на рускиот претседател, Јуриј Ушаков, денеска ја потврди веста, по шпекулациите на неколку медиуми. Ушаков им рече на новинарите дека Анкара „поднела апликација за полноправно членство“ и дека земјите-членки сега ќе ја разгледаат понудата. Претседателот Ердоган ја прифатил и поканата да присуствува на самитот на БРИКС во рускиот град Казан, закажан за октомври.
Турција е првата земја на НАТО што бара членство во БРИКС, потег за кој некои сугерираат дека е делумно поттикнат од несогласувањата меѓу земјите на НАТО околу украинскиот конфликт. Портпаролот на владејачката партија АК на Ердоган рече дека претседателот „неколку пати“ изјавил дека „Турција сака да учествува во сите важни платформи, вклучително и БРИКС“.
Турција е земја-кандидат за членство во Европската Унија уште од април 1987 година, кога Унијата беше Европска економска заедница. Преговорите за полноправно членство ги почна во октомври 2005 година, но од потребните 35 поглавја досега отворени се само 16, а само едно затворено. Од 2016 година преговорите се на статус кво.
