Човекот кој се пријави во полиција тврдејќи дека е исчезнатиот Тимоти Пицен не е момчето кое е исчезнато пред 8 години. Тоа го утврди ДНК анализата, која откри кој е всушност неговиот вистински идентитет.
Ден претходно момче кое се претстави како Тимоти Пицен, стар 14 години, им изјави на властите во Њупорт дека бил киднапиран во Синсинати, Охајо и дека успеал да им побегне на киднаперите. Тој изјавил дека бил киднапиран од двајца мажи кои ги опишал како атлетски градени, кои возеле теренско возило Ford и дека за последен пат престојувале во хотел во Кентаки од каде успеал да избега, пренесува Reuters.
ДНК анализата покажала дека всушност станува збор за 23-годишниот Брејн Мајкл од Медина, Охајо. Тој минал 1,5 година во затвор за вандализам и провала и бил пуштен на 7 март.
ФБИ соопшти дека сè уште трагаат по малиот Тимоти и дека нема да го заборават момчето.
„Да бидеме јасни, спроведувањето на законот нема да го заборави Тимоти, се надеваме дека еден ден повторно ќе го споиме со неговото семејство. За жал, тој ден сè уште не е дојден“, изјави специјалниот агент на ФБИ, Тимоти Бин.