Жените кои спијат помалку од седум часа навечер во текот на бременоста имаат зголемен ризик да родат деца со доцнење во развојот.
Ова го покажа студија објавена во списанието за клиничка ендокринологија и метаболизам (JCEM).
Научниците ги анализирале податоците за спиењето на 7.000 бремени жени во Кина. Нивните деца биле тестирани за доцнење во развојот на возраст од шест месеци до три години. Спиењето помалку од седум часа за време на бременоста може да биде поврзано со зголемен ризик од невроразвојни проблеми кај децата, покажа истражувањето. Ова може да го наруши размислувањето, однесувањето и учењето на децата. Негативните ефекти од лишувањето од сон биле поизразени кај машките деца.
Недоволното спиење е исто така поврзано со промените во метаболизмот на гликозата кај мајката и детето. Претходните истражувања покажаа дека недостатокот на сон за време на бременоста може да го зголеми ризикот од гестациски дијабетес.
Речиси 40% од трудниците страдаат од проблеми со спиењето поради хормонални промени, физичка непријатност, зголемено мокрење и други фактори. Една нова студија ја истакна важноста на проучувањето и борбата против несоницата кај бремените жени.
