Луѓето кои имале COVID-19 имаат поголем ризик од низа оштетувања на мозокот и ментални пореметувања година дена подоцна во споредба со оние кои никогаш не се заразиле со коронавирусот, откритие кое би можело да влијае на милиони Американци, открија американските научници.
Едногодишното истражување, чии резултати се објавени во списанието Nature Medicine, ја проценувало состојбата на мозокот кај милиони американски ветерани за 44 различни нарушувања користејќи медицинска евиденција без идентификатори на пациентите.
Мозочни и други невролошки пореметувања се појавиле за 7% повеќе кај оние кои биле заразени со ковид во споредба со слична група ветерани кои никогаш не се заразиле.
Пренесено на општата популација тоа значи дека отприлика 6,6 милиони Американци имаат мозочни оштетувања поврзани со инфекцијата од коронавирусот, објави тимот истражувачи.
„Резултатите покажуваат разорни долготрајни ефекти од COVID-19“, вели авторот на истражувањето, д-р Зијад Ал-Али од Медицинскиот факултет при Универзитетот во Вашингтон.
Ал-Али рече дека претходните студии разгледувале помала група на нарушувања и дека воглавно биле намерени кон хоспитализираните пациенти, додека неговата студија ги вклучува и хоспитализираните и нехоспитализираните пациенти.
Нарушувањата со помнењето, кои обично се нарекуваат мозочна магла, биле најчестиот симптом.
Во споредба со контролните групи, луѓето заразени со ковид имале 77% поголем ризик од развој на проблеми со помнењето.
Луѓето заразени со вирусот имале и 50% поголема веројатност да доживеат исхемичен мозочен удар, кој е предизвикан од згрутчување на крвта, во споредба со групата која никогаш не била заразена.
Оние кои имале ковид имале 80% поголема веројатност да добијат изненадни напади како епилепсија, 43% поголема веројатност дека ќе имаат проблеми со менталното здравје, како анксиозност и депресија, 35% поголема веројатност дека ќе имаат главоболки и 42% поголема веројатност дека ќе патат од проблеми со движењето, како треперење, во споредба со контролните групи.
Научниците велат дека владите и здравствените системи мораат да смислат планови за светот после ковидот.
„Со оглед на колосалниот размер на пандемијата, соочувањето со тие предизвици бара итни и координирани - но засега непостоечки - глобални, национални и регионални стратегии за одговор“, додава д-р Ал-Али.
