Новооткриениот вид од класата водоземци го доби името по младата шведска активистка за заштита на прородата, Грета Тунберг.
Биолозите од непрофитната еколошка организација Rainforest Trust од источниот дел на Панама открија нов вид на водоземци. Жабата припаѓа на родот Pristimantis, кој вклучува 570 видови. Од нив, само 13 живеат во Панама. Животното го добило името Pristimantis gretathunbergae по активистката Грета Тунберг.
„Грета нѐ потсетува, повеќе од кога било, дека иднината на секој вид на Земјата зависи од она што во моментов го правиме“, велат членовите на тимот научници.
Дождовните шуми во Панама не се доволно истражени, а секоја експедиција се соочува со многу предизвици. Во овој случај, научниците морале да се искачат на планината Серо Чуканти, висока околу 1.500 метри, на коњ и пеш по тесни планински патеки, сето тоа во провинцијата Дариен. Експедицијата ја воделе локалниот биолог Абел Батиста и Швајцарецот Конрад Меберт.
Големината на новооткриениот вид жаба варира во зависност од областа каде што е пронајдена, но женките се секогаш поголеми од мажјаците. Просечно е 21-36 mm за мажјаци и 27-45 mm за женки. Новооткриениот водоземец има карактеристични испакнати црни очи, контрастна светла горна усна, голема глава и конусна туберкула на горниот очен капак.
Живеалиштата се многу фрагментирани, што ја објаснува забележливата разлика во големината на единките. Научниците се убедени дека овој претставник на фауната веќе се соочува со сериозни закани поради уништувањето на шумите и климатските промени.
