Архитектонските и уметничките вештини на древните Египќани го изненадуваат човештвото одново и одново.
Министерството за антиквитети на Египет неодамна соопшти дека е откриена добро сочувана гробница украсена со живописни релјефи и натписи што изгледаат „како да се сликани вчера“.
Министерот за антиквитети Халед ел-Енани рече дека археолошкото откритие датира од пред 4.000 години, иако боите на релјефите се толку живописни, како да биле сликани неодамна.
Детално насликаната гробница се смета дека е на Хуви, висок службеник во Петтата династија што владееле во 25 и 24 век пред н.е.
Министерот Ел-Енани на откривањето на гробницата однесе 52 странски амбасадори, културни аташеа и египетската актерка Јосра.
Гробницата е дел од огромниот некропол Сакара лоциран јужно од Каиро. Структурата е во специфична форма на латинската буква L, рече главниот археолог Мохамед Муџахид кој додава дека пред гробницата имало мал тунел, што е карактеристика само на прамидите.
Во живописните и одлично зачувани релјефи и цртежи се претставени членови на кралското семејство, поради што археолозите сметаат дека Хуви имал тесна врска со Џедкаре Исеси, фараонот во тој период чија пирамида се наоѓа во непосредна близина.
Претпоставката е дека или биле во крвно сродство или ваквата поставеност е резултат на реформите на фараонот во администрацијата и погребните ритуали.
Во гробницата е најдена и мумијата на Хуви. Ова откритие е едно од низата нови археолошки откритија во Египет.
Земјата се надева дека новите откритија ќе помогнат да се обнови репутацијата на Египет како туристичка атракција, што беше значително оштетена со политичките немири во земјата во 2011 година.