Новиот филм на Квентин Тарантино сѐ уште не е снимен, но тоа не ги спречи шпекулациите околу неговиот заплет да кружат наоколу.
Според шпекулациите, во новиот филм на американскиот режисер требаше да се работи за Чарлс Менсон и убиствата на неговата Фамилија Менсон. Но, според изворите, филмот нема директно да ја обработува приказната за Менсон, иако таа ќе биде дел од дејствието.
Според Vanity Fair, филмот ќе ја користи приказната на убиствата на Фамилијата Менсон како споредно дејство, кое ќе се одвива во сенка на главното дејство.
„Филмот е сместен во Лос Анџелес, во летото 1969 година. Според извор кој го има прочитано целото сценарио, се работи за телевизиски актер кој имал една хит-серија, но сега сака да влезе во филмската индустрија. Неговиот помошник, кој е и негов каскадер, го сака истото. Грозоморното убиство на Шерон Тејт и нејзините четворица пријатели од страна на култот на Чарлс Менсон служи како помошна приказна во филмот“, пишуваше во извештајот на Vanity Fair.
Исто како што „Inglorious Basterds“ не беше баш за Хитлер, така и овој филм нема да биде баш за Чарлс Менсон.
Ако може да им се верува на овие извештаи, Марго Роби била контактирана за да ја одигра улогата на Шерон Тејт. Снимањето треба да започне во јуни следната година, а филмот се очекува некаде кон крајот на 2019 година.
