Египетските власти соопштија дека археолозите откриле осум саркофази со мумии на околу 40 километри јужно од Каиро.
Министерството за антиквитети соопшти дека мумиите од доцниот период (664-332 година пред н.е.), се добро зачувани, покриени со слој обоен материјал, што се нарекува картонажа, во облик на човек.
Мумиите биле најдени во областа каде се наоѓаат пирамидите на фараонот Аменемхат Втори во кралската некропола Дахшур. Некрополата е гробница за членовите ка кралскиот двор и високи службеници.
Во оваа област се најдени дел од најстарите пирамиди, меѓу кои Кривата пирамида на фараонот Снеферу и Црвената пирамида.
Египет се надева дека овие откритија ќе го подобрат туризмот со понудите за разгледување антиквитети. Туризмот е важна стопанска гранка на Египет, но трпи последици од политичките превирања во земјата што почнаа во 2011 година.