Дали е возможно некои Викинзи да биле муслимани? Ова прашање го поставиле научниците кои пронашле викиншка корица на која со древно арапско писмо бил напишан зборот „Алах“.
Аника Ларсон од универзитетот Упсала за BBC раскажала дека испитувала фрагменти од облека пронајдена на илјада години стар шведски гроб, кога забележала необични симболи од сребрени нити.
Подоцна успеала да го препознае името „Алија“ на древно куфско писмо, што веројатно се однесува на роднина на пророкот Мухамед, четвртиот калиф на исламот.
Тогаш, со помош на огледало, го пронашла зборот „Алах“ извезен во внатрешноста.
„Неверојатна е и самата помисла дека траките и костимите од овој гроб стигнале на запад од лулките на Исламот“, вели Ларсон.
Фрагментите кои Ларсон ги пронашла се први во Скандинавија на кои се споменува Алија, личност која е од големо значење за шиитските муслимани.
Исто така, во 2015 година бил пронајден прстен со натпис „Алах“ на куфско писмо, што ја отвора можноста дека другите исламски артефакти во викиншките гробови не пристигнале на запад преку трговија или грабежи, како што од порано се претпоставувало.
„Не може да се исклучи можноста дека во некои од тие гробови имало муслимани“, истакна Ларсон.
