Скоро цела деценија откако беше запрено производството на претходната генерација, претставен е новиот GMC Hummer.
Познатиот теренец воскресна како електрично возило, со препознатлив, но модернизиран дизајн.
Карактеристичната предна маска на Hummer е стилизирана и доби LED светлосен потпис, додека силуетата на возилото наликува на претходникот.
Покривот е дизајниран така што неговите провидни панели можат да се отстранат и да се спакуваат во предниот простор за багаж.
Во тој случај, Hummer наликува на Jeep Gladiator, само без можност за спуштање на предното стакло.
Бидејќи станува збор за класичен теренец, возилото е стандардно опремено со специјални 35-инчни Goodyear Wrangler All Territory MT гуми, а Hummer е во состојба да помине водена пречка со длабочина од 610 mm.
За оние на кои тоа не им е доволно, на располагање имаат и опција за пневматици од 37 инчи.
Внатрешноста на возилото ја краси едноставен, класичен дизајн со правоаголни елементи и модерни удобности, како што е дигитализирана инструмент-табла со дијагонала од 12,3 инчи и огромен екран на мултимедијалниот систем од 13,4 инчи.
Поголемиот дисплеј прикажува и слики од едната од дури 18 камери со кои е опремен новиот Хамер.
Клиентите исто така ќе имаат пристап до најновата верзија на системот за полуавтономно возење Super Cruise , што му овозможува на возачот да ги тргне рацете од воланот на над 320.000 километри компатибилни автопати низ САД и Канада за кои е дизајнирана оваа технологија.
Една од најзначајните иновации на Hummer за 2021 година е неговиот електричен погон.
Возилото го придвижуваат три електромотори со вкупна комбинирана моќност од 1.014 КС (746 kW), додека максималниот вртежен момент изнесува дури 15.592 Nm.
Благодарение на овие спецификации, Hummer може да забрза од 0-60 милји на час (0-96 км/ч) за околу 3 секунди!
Со полни батерии, возилото може да помине над 563 км пред да застане за полнење.
Hummer има капацитет за полнење од дури 350 kW, а производителот тврди дека возилото за 10 минути може да се наполни доволно за да помине дополнителни 160 км.
Меѓу другите карактеристики, вреди да се спомене и специјалниот систем за управување на сите тркала, наречен CrabWalk, кој им овозможува на предните и задните тркала да се вртат во иста страна, под ист агол и возилото да се поместува дијагонално при помали брзини, за полесно да се совладаат пречки на потешки терени.
Покрај тоа, Hummer е опремен со адаптивна воздушна суспензија, со која автомобилот може да се подигне до 150 мм доколку е потребно.
Новиот GMC Hummer ќе се најде во продажба во 2021 година, со пакетот Edition 1, по цена од 112.595 долари.
Поевтините верзии со послаби погонски конфигурации ќе пристигнат подоцна.