Почнувајќи од следното Светско првенство на ФИФА, кое ќе се одржи во Мексико, САД и Канада во 2026 година, ФИФА планира да воведе пенали во случај натпреварите во групата да завршат нерешено. Ова го открива доверливиот британски The Athletic. Победникот од пенал серијата ќе добие бонус.
Дури има и варијанта пенали да се изведуваат пред почетокот на секој натпревар во групата, за да нема потенцијален договор меѓу репрезентациите, бидејќи може да биде ситуација одреден резултат да оди во корист на двете селекции, со што ќе се елиминира трета репрезентација во групата“, пишува The Athletic.
На следното СП првпат ќе играат дури 48 репрезентации, што е зголемување за 50 проценти во однос на досегашниот број на учесници. За четири години репрезентациите ќе бидат поделени во 16 групи со по три селекции. Двајцата првопласирани од секоја група ќе одат во нокаут фазата. Марко ван Бастен, познатиот голгетер и директор за технички развој на ФИФА, се залага за воведување на ваква пенал серија за полесно да се одлучува за конечниот пласман во групите.
Причина се групите со по три репрезентации
„Пеналите навистина може да бидат опција за турнири со групи од три екипи каде што играте против двајца противници. Затоа што постои голем ризик сите три тима да завршат изедначени по бодови и голови“, изјави Ван Бастен за германски Bild.
Од The Athletic истакнуваат дека е можно ФИФА да го промени системот на натпреварување на Светското првенство во 2026. Во тој случај 48-те репрезентации би биле поделени во 12 групи со по четири селекции. Пласман во нокаут фазата би добиле двете најдобро пласирани репрезентации од секоја група. Во осминафиналето би оделе и осумте најдобри третопласирани екипи. Во тој случај, ФИФА размислува да воведе пенали во случај на реми.