Поранешниот германски фудбалски репрезентативец и актуелен член на турскиот гигант Фенербахче, Месут Озил, меѓу првите играчи го крена гласот против формирањето на новото клупско натпреварување под името Супер лига, зад која станаа 12 финансиски моќни европски екипи.
Озил на својот Twitter профил истакна дека најавената Супер лига нема ништо заедничко со духот на фудбалот.
„Децата растат сонувајќи еден ден да освојат Светско првенство и Лига на шампиони, а не таму некоја си Супер лига. Уживањето во големите натпревари се состои во тоа тие да се случуваат еднаш или двапати годишно, а не секоја недела. Навистина е тешко фудбалските фанови да го разберат ова“, напиша Озил.
Меѓу клубовите кои застанаа зад новото натпреварување, најавено да започне во август, се Реал Мадрид и Арсенал, две екипи за кои Озил настапуваше во минатото.