Иако Барселона изгледа незапирливо во досегашниот дел од сезоната, каталонскиот клуб сепак планира да биде многу активен во претстојниот зимски преоден рок, тврдат шпанските медиуми.
Шпанскиот весник Marca ја откри листата на потенцијални засилувања, за која вели дека барем двајца од наведените играчи од јануари ќе го носат дресот на Барселона.
На врвот на листата се наоѓа Озил, кој каталонците го сметаат како приоритетно засилување. Тој има разочарувачка сезона во Арсенал, и одбива да потпише нов договор со тимот од Лондон, а Барселона го гледа тоа како шанса да го доведе Германецот во своите редови.
Покрај него, на листата се наоѓаат уште двајца Германци кои настапуваат во редовите на Шалке, Макс Мејер и Леон Горецка. Двајцата се креативци од средниот ред, а Макс Мејер пред четири години, кога дебитираше во составот на Шалке, беше сметан за еден од најталенираните млади играчи во Европа.
Листата ја заокружуваат Набил Фекир од Лион и Александер Головин од ЦСКА Москва. Французинот Фекир би можел да биде големо засилување за нападот, но и за крилните позиции, и тој има одлична сезона во дресот на Лион. Головин, пак, во Барселона би го сметале како вложување во иднината, ако се земе во предвид дека овој играч има само 21 година.
