Германскиот фудбалер Месут Озил на презентацијата во новиот клуб Фенербахче потврди дека нема намера да се врати во германската репрезентација и дека не планира да се врати во Бундеслигата во иднина.
Озил играше за германската репрезентација од 2009 до 2018 година и во тој период одигра 94 натпревари за националниот тим и постигна 23 гола со 43 асистенции. Со оваа репрезентација во 2014 година стана светски шампион во Бразил.
Тој се повлече од националниот тим во 2018 година кога локалната јавност го осуди како директен виновник за испаѓањето од Светското првенство, наведувајќи го расизмот како главна причина.
„Штом одлучам нешто, нема враќање. Во тој поглед, повеќе нема да играм за германската репрезентација и им посакувам многу успех“, рече играчот за врска на презентацијата.
Тој одговори кратко и едноставно на прашањето, дали некогаш размислувал да се врати во националниот тим.
„Не, никогаш...“, дециден беше Германецот.
Тој рече дека очекува голем притисок во дресот на Фенербахче, но дека се навикнал во текот на неговата кариера, а исто така додаде дека многу го сака овој турски клуб и дека се надева дека ќе игра на теренот што е можно побрзо.