Приштина, 6 август 2019 (МИА) – Министерот за надворешни работи на Косово Беџет Пацоли порача дека Косово нема да ги признае пасошите издадени од Русија за жителите на непризнаените држави Донецк и Луганск во Украина, јави дописникот на МИА од Приштина.
Пацоли на својата страница на Твитер напиша дека Косово го поддржува суверенитетот и територијалниот интегритет на Украина.
– Русија треба да прекине со илегалните интервениции во Украина и да ги повлече своите трупи, напиша Пацоли.
Донечката и Луганската Народна Република прогласија независност од Украина на 12 мај 2014, но до ден денес ниту една држава не ги призна, ниту пак Русија. Се признаа меѓусебно, а добија поддршка само од Јужна Осетија, но и таа интернационално непризнаена.
И покрај тоа што ни Русија не ги признава, мнозинското руско население добива руски пасоши.
