На европските берзи претпладнево се тргува внимателно бидејќи инвеститорите не се подготвени да ризикуваат пред објавувањето на кварталните деловни резултати на голем број компании и состанокот на челниците на американската централна банка.
Индексот STOXX 600 на водечките европски акции беше намален за 0,3 отсто во 9:30 часот, по силниот раст од минатата недела.
Истовремено, лондонскиот FTSE индекс се лизна за 0,25 отсто, на 7.258 поени, додека франкфуртски DAX ослабе 0,28 отсто, на 13.216 поени, а париски CAC 0,50 отсто, на 6.185 поени.
Инвеститорите се претпазливи додека ги чекаат извештаите со деловните резултати на голем број големи компании и банки, од UBS и Unilever до Deutsche Bank, Barclays, Shell, Renault...
Внимателно се тргува и на азиските берзи, па индексот MSCI на азиско-пацифичките акции беше во минус од 0,4 отсто околу 9:45 часот.
Истовремено, на токиската берза индексот Nikkei ослабе за 0,7 отсто, додека цените на акциите во Австралија, Шангај и Хонгконг се лизнаа меѓу 0,1 и 0,6 отсто. Во Јужна Кореја, пак, тие се зголемија за 0,4 отсто.
Азиските инвеститори се претпазливи бидејќи нема многу причини за продолжување на растот на цените на акциите, имајќи предвид дека поради високата инфлација централните банки ги зголемуваат каматните стапки, додека економскиот раст забавува.
Оваа недела, инвеститорите ќе се фокусираат на состанокот на лидерите на американската ФЕД. Со оглед на тоа што инфлацијата во САД лебди на највисоките нивоа во повеќе од 40 години, се очекува ФЕД повторно агресивно да ги зголеми клучните каматни стапки, најверојатно за 0,75 процентни поени.
Оваа недела ќе бидат објавени и податоците за бруто домашниот производ на САД во вториот квартал. Се очекува благ квартален раст, но никого не би изненадило доколку се покаже дека економијата втор квартал по ред паѓа на квартална основа, што би значело дека најголемата светска економија е во рецесија.
Европските берзи се зголемија минатата недела, бидејќи стравувањата од рецесија се намалија во Европа, откако рускиот гас продолжи да тече низ Северен тек 1, гасоводот меѓу Русија и Германија, во четвртокот по 10-дневниот ремонт.
Сепак, енергетската криза и зголемените каматни стапки поради високата инфлација може да ги турнат европските економии во рецесија.
„Берзите очигледно во цените ги вградија очекувањата за забавување на економскиот раст, но дали е вградена и рецесијата? Би рекол не, така што во таа смисла не сум сигурен дека пазарот го достигна дното“, вели Реј Атрил, директор во Националната австралиска банка.