Конечно добри вести за љубителите на калчото. Серија А и Би ќе почнат со натпревари на 20 јуни, а одредени се и датумите за Копа Италија.
Прекинатата сезона во двете најквалитетни лиги во Италија, А и Би, ќе продолжи на 20 јуни. Така е одлучено на состанокот кој заврши вечерва помеѓу властите и Федерацијата.
Сепак, прво ќе почнат натпреварите од полуфиналето во Копа Италија и тоа со Јувентус - Милан на 13 јуни, а наредниот ден Наполи - Интер. Ќе се игра еден натпревар без реванш, а финалето ќе следува веднаш на 17-ти и тоа на „Олимпико“ во Рим.
„Како што рековме, фудбалот ќе се врати кога условите ќе го дозволат тоа. Сега нашата земја се враќа во нормала, а и спортот се буди. Министерството за здравство го одобри протоколот за продолжување на сезоната и потребните мерки за карантин во случај на позитивен фудбалер“, рече Винченцо Спадафора, министер за спорт на Италија.
Властите инсистирале Федерацијата да има и резервен план за во случај на втор бран на коронавирусот во земјата.
„ФИГЦ ме увери дека постои план Б и план Ц, плеј-оф и плеј-аут и кристализирање на табелата. Јас лично го поздравувам тоа што со натпреварите од Копа Италија ќе ѝ се даде еден позитивен сигнал на целата земја. Да биде јасно: ќе биде рестартирање на три важни натпреварувања во корист на сите Италијанци“, заврши Спадафора.
И Серија Би ќе почне исто така на 20 јуни, додека во план е продолжување и на трите групи од Серија Чи, односно третата лига, но за тоа допрва ќе се одредува датум.
