На Волстрит, индексот S&P 500 силно порасна во средата, најмногу благодарение на корекцијата на цените на акциите по шестдневниот пад, додека инвеститорите беа охрабрени и од падот на приносите на обврзниците.
Dow Jones зајакна 1,88 отсто, на 29.683 поени, додека S&P 500 порасна за 1,97 отсто, на 3.719 поени, а индексот Nasdaq порасна за 2,05 отсто, на 11.051 поени.
Откако во вторникот падна на најниското ниво во скоро две години, S&P 500 порасна вчера за прв пат во седум трговски дена.
Ова е благодарение на корекција на цените на акциите, како и пад на приносите на обврзниците втор ден по ред.
„Приносите на двегодишните трезори постојано се зголемуваат во последниве недели и сега се намалуваат два дена по ред, давајќи му здив на берзата“, вели Арт Хоган, стратег во B. Riley Wealth.
Во сите 11 најважни сектори на индексот S&P 500, цените на акциите пораснаа вчера, а највисоко во енергетскиот сектор, за 4,4 отсто, благодарение на растот на цената на нафтата.
Значително пораснаа и цените на акциите на технолошките компании, како што се Microsoft, Amazon i Meta Platforms, кои се погодни за средина со пониски трошоци за задолжување.
Но, акциите на Apple паднаа за повеќе од 1 отсто по веста дека технолошкиот гигант се откажа од плановите да го зголеми производството на својот нов iPhone оваа година, бидејќи побарувачката не успеа да се зголеми колку што се очекуваше.
Вака вчера беше запрен неколкудневниот пад на пазарот, кој е под притисок на стравувањата дека агресивното заострување на монетарната политика од страна на американската централна банка, ќе ја турне економијата во рецесија.
Минатата недела ФЕД ги зголеми каматните стапки трета сесија по ред за 0,75 процентни поени, на опсег од 3 до 3,25 отсто, што е нивно највисоко ниво од 2008 година.
И лидерите на ФЕД велат дека ќе продолжат да ја зголемуваат цената на парите за да ја спуштат инфлацијата од највисоките нивоа во повеќе од 40 години.
Вчера, Рафаел Бостиќ, претседател на филијалата на ФЕД во Атланта, рече дека поддржува уште едно зголемување на каматните стапки од 0,75 процентни поени во ноември.
Чарлс Еванс, претседател на Банката на федерални резерви во Чикаго, сепак рече дека ФЕД веројатно ќе ги постави каматните стапки на нивоата што треба да бидат на почетокот на следната година.
Ова ќе го забави растот на економијата, а можеби и ќе предизвика подлабока рецесија. Поради ова, индексот S&P 500 падна за околу 22 отсто од почетокот на годината.
Цените на акциите вчера пораснаа и на европските берзи. Лондонски FTSE индекс зајакна за 0,30 отсто, на 7.005 поени, додека франкфуртски DAX порасна за 0,36 отсто, на 12.183 поени, а париски CAC зајакна 0,19 отсто, на 5.765 поени.
