Министерот за спорт на Викторија, Мартин Пакула истакна дека никој од Австралија не го уценува Новак Ѓоковиќ да се вакцинира, туку дека сакаат да ја заштитат нивната заедница.
Организаторите на Австралија Опен соопштија дека сите учесници на првиот Грен слем во сезоната мора да примат вакцина против коронавирус. Оттогаш се зборува дали српскиот тенисер ќе отпатува во Мелбурн.
Неодамна неговиот татко Срѓан Ѓоковиќ изјави дека Новак нема да учествува доколку го уценуваат и условуваат.
„Ако сте тенисер од странство треба да покажете одговорност кон местото во кое доаѓате“, рече Пакула.
„Поради тоа бараме од нив да ги почитуваат истите барања кои ги почитуваат и граѓаните на Викторија. Не станува збор за уцени, само сакаме да ги заштитиме граѓаните“.
Министерот додаде дека се надева дека ќе учествува и Новак Ѓоковиќ.
„Се надевам дека ќе се вакцинира и ќе игра на АО. Но, доколку се одлучи да не го направи тоа, тоа си е негова работа“.
Ѓоковиќ не сакаше да открие дали е вакциниран.