Памела Андерсон била поканета на гала вечер во организација на фудбалскиот клуб Олимпик Марсеј завчеравечер, за собирање донации за сиромашните деца во Марсеј.
Андерсон, која е во врска со фудбалерот на Олимпик Марсеј Адил Рами, била разочарана кога во текот на вечерта биле издвоени 100.000 евра од прилозите за обнова на катедралата Нотр Дам што беше оштетена во пожар.
„Синоќа бевме на годишната вечера на ОМ за да помогнеме во собирањето пари за сиромашните деца во Марсеј“, објасни на Twitter актерката и активистка за правата на животните.
„Беа собрани многу пари во таа цел и потоа беше предложено ‘прекрасно’ изненадување – дел од парите да биде насочен во корист на обнова на Нотр Дам.“
На аукцијата за таа пригода била понудена и гитара на Брус Спрингстин за која биле собрани двојно повеќе пари отколку целата сума за децата.
„Бев многу лута и разочарана и го замолив Адил да си заминеме. И си заминавме“, напиша Андерсон.
„Сигурно на децата во Марсеј повеќе им требаат 100.000 евра отколку за катедралата за која веќе се собрани повеќе од милијарда евра донации од неколкумина милијардери“, заклучи популарната русокоса и додаде дека се надева дека Олимпик Марсеј ќе ги насочи парите таму каде што се најпотребни.
Од Олимпик Марсеј кажаа само дека на настанот биле собрани вкупно 439.760 евра.