Директорот на компанијата Razer, Мин Лианг Тан потврди дека проектот Hazel станува реалност, ќе се произведува паметната RGB маска којашто 95% штити од вируси и бактерии.
Станува збор за концепт уреди коишто Razer ги претстави на саемот CES претходно годинава. Тоа се всушност маски со RGB светло во склоп на проектот Hazel.
Маската поради осветлувањето е проѕирна, а опремена е со микрофон и звучник кои го засилуваат гласот на тој којшто ја носи.
Се очекува маската да биде ефикасна како и N95 маската со бактериски филтер, која запира 95% од честичките во воздухот.
Во интервју за Yahoo Finance, Тан откри дека биле загрижени околу релевантноста на маската по почетокот на вакцинацијата, но со оглед на тоа што и по вакцинацијата луѓето треба да останат многу внимателни, одлучиле да продолжат со производството.
„Проектот Hazel ќе стане реалност и мислам дека сите, за жал, уште долго време ќе носиме маски“, вели тој.
Цената и датумот кога ќе излезат во продажба маските не е познат, но Razer ќе треба да набават сертификати и одобренија од Американската агенција за храна и лекови, Центарот за контрола и спречување на болести, како и од Администрацијата за безбедност и здравје на работа.