Легендарниот играч на Црвена звезда, Дарко Панчев, уште еднаш истакна дека направил голема грешка кога решил да се пресели во Интер.
Панчев во 1992 година замина во Интер каде постигна само 3 гола, а во 1995 година се пресели во Фортуна од Диселдорф.
„Секако, тоа воопшто не е спорно. Не само што Интер тогаш имаше неквалитетен тим, без игра, особено за нас напаѓачите. Ниту клупската атмосфера не беше во ред. Јас тоа на некој начин го почувствував. Не дојдов таму како млад играч па да морам да се докажувам, туку како еден од најбараните напаѓачи во Европа. Релативно брзо се скарав со тренерот и клупските челници“, изјави Панчев за српскиот Спортски журнал.
Откри дека тогаш имал понуди и од други клубови.
„Во тоа време бев меѓу најбараните напаѓачи во Европа. Имавме преговори со Барселона, чиј тренер беше Јохан Кројф. Ме бараше и Алекс Фергусон во Манчестер Јунајтед. Потпишав преддоговор со Милан. Реал Мадрид беше заинтересиран и неговиот претседател Рамон Мендоса доаѓаше на преговори. Имав избор, а јас ја одбрав најлошата варијанта. Никој не ми е виновен. Одговорноста е моја“, додаде Панчев.
Панчев кариерата ја заврши во 1997 година во дресот на швајцарски Сион.
