Македонскиот најдобар играч за минатиот век, Дарко Панчев, проговори за неговото време поминато во Вардар и причините поради кои си заминал.
Панчев во април 2017 стана спортски директор на Вардар, а година дена подоцна си замина од клубот.
„Со Вардар се случуваше нешто чудно. Илија Најдоски и јас дојдовме за да го подобриме квалитетот на составот за да стане поконкурентен во Европа. Многу брзо успеавме во тоа и направивме големо изненадување кога го елиминиравме Фенербахче. Клубот заработи доста пари од настапот во групната фаза во Лига Европа. Очекувавме луѓето кои го водат клубот да ги инвестираат тие пари во ангажман на уште подобри играчи за Вардар да стане уште посилен и поконкурентен. За жал, се случи спротивното, во следните година дена да нема воопшто пари, да им се должи на сите, некои играчи си заминаа и не беа донесени соодвени замени па резултатите беа катастрофални“, рече тој во интервју за хрватскиот Večernji list.
Вардар зема доволно пари од УЕФА со историскиот настап во групната фаза од Лигата на шампиони, но тие средства потоа не беа инвестирани во клубот. Барем не со видливи резултати.
„Најдоски и јас видовме дека нема ништо од она што беше договорено на почетокот и затоа полека почнавме да се повлекуваме и повеќе не сме дел од Вардар. Зошто се случи така, можат да објаснат само луѓето кои го водат клубот“.
