Земјотресот на светските берзи на капитал и стоки предизвикан од пандемијата со Covid-19 трае веќе три месеци и ја поттикна најверојатно најразурнувачката распродажба на активи уште од Големата депресија.
Бројките се запрепастувачки, наведуваат британските медиуми. На светските берзи се „збришани“ 15 илјади милијарди долари во вредност на акции, цената на нафтата опадна за 60 отсто, а пазарите во раст, како Бразил, Мексико и Јужна Африка, бележат пад на вредноста на нивната национална валута за повеќе од 20 отсто.
Притисокот врз берзите дополнително ги засили стравувањата дека можат да пропаднат цели сектори – „испари“ речиси половината од вредноста на акциите на авиокомпаниите, а економиите што веќе се во пад се соочуваат со нов бран на криза на државни долгови, додаваат британските медиуми.
Гилотината не ја одбегна ниту Волстрит, каде е забележан слободен пад на индексот Dow Jones за 22 отсто, и индексот S&P 500 за 24 отсто, азиско-пацифичкиот MSCI, што ја мери вредноста на акциите на берзите во 49 земји, загуби речиси 25 отсто од вредноста, додека лондонскиот FTSE падна за 27 отсто.
Илустрирајќи го интензитетот на ударот што го трпат светските берзи британските медуими наведуваат дека рекордниот квартален пад на вредноста на Волстрит во 1932 година, за време на Големата депресија, изнесувал 40 проценти, а фактот дека индексите Dow Jones и S&P 500 пред еден месец беа на рекордно ниско ниво, сведочи за тоа дека овој пат падот е побрутален.
Акциите во Кина, земјата која вирусот прва ја погоди, релативно добро минаа со пад од само 11 отсто во доларска противвредност, но последиците на другите големи пазари во нагорна линија беа многу поболни бидејќи нивните главни пазари за стоките се во валута во колапс.
Руските акции, што минатата година беа на чело на листата добитници, потонаа за 40 отсто во доларска вредност, додека вредноста на акциите на берзата во Бразил падна за 50 отсто.
