Двајцата македонски интернационалци настапија на денешните натпревари во кои нивните екипи забележаа победи.
Прв играше тимот на Пандев, Џеноа, кој со 2:1 дома го совлада и елиминира Катанцаро, екипа која се натпреварува во Серија Чи. Пандев доби одмор од тренерот Роналдо Маран и натпреварот го следеше од клупата сѐ до 84. минута кога влезе за со неговото искуство да му помогне на тимот да ја задржи топката бидејќи гостите штотуку поостигнаа гол за 2:1.
Нешто покасно Илија Несторовски се најде во почетниот состав на Удинезе кој на домашен терен играше со второлигашот Виченца. Македонскиот напаѓач учествуваше при голот за 1:0 во 21. минута кога неговиот удар го одбрани гостинскиот голман, но на одбиената топка налета Фернандо Форестиери и ја затресе мрежата. Несторовски на почетокот од вториот дел имаше шанса по еден удар со глава, но не успеа да погоди. Ги одигра 90-те минути во кои Удинезе славеше со 3:1.
Денеска во Копа Италија настапи и трет македонски фудбалер. Леонард Жута, кому ова му е прва сезона во Лече, влезе во игра во 71. минута на гостувањето кај Торино кога резултатот беше 1:1. Натпреварот замина во продолженија каде Торино со дав гола во вториот дел победи со 3:1.
Во шестнаестинафиналето Џеноа и Пандев ги чека дерби против Сампдорија, а победникот ќе оди на Јувентус. Несторовски и Удинезе ќе играат против Фиорентина во битка за пласман во осминафиналето каде ги чека Интер.
