Новиот претседател на Фудбалската федерација на Македонија, Масар Омерагиќ, и спортскиот директор на национални селекции, Горан Пандев, одржаа состанок во Куќа на фудбалот со селекторот на македонската репрезентација, Благоја Милевски.
Oтворено и конструктивно разговараа за сите актуелни настани и важни теми поврзани со најдобрата македонска репрезентација, но и за други аспекти од соработката што допрва започнува меѓу Горан Пандев како спортски директор на националните селекции и селекторот на репрезентацијата.
„Имавме отворен и пред сѐ искрен разговор. Претседателот на Федерацијата ја повтори искажаната поддршка за работата на македонската репрезентација. Со Горан се согласивме дека репрезентацијата секогаш треба да биде над сите нас. Тоа е национален интерес и секогаш ќе биде во прв план. Сите треба да се ставиме во функција на тоа и на Македонија. Се надевам дека ќе имаме добра соработка во интерес на тимот, но и на сите кои ја поддржуваат македонската репрезентација“, ФФМ ја пренесува изјавата на селекторот на македонската репрезентација, Благоја Милевски.
„Драго ми е што отворено разговаравме за тоа што може да биде подобро во иднина и дека заедно ќе се стремиме да одиме напред кон нови победи“, изјави Горан Пандев.
„Заедно со претседателот Омерагиќ ни беше важно да разговараме отворено со селекторот за сите теми и му благодарам што го сфати она што го сметаме за правилно, а тоа е дека како мала држава мораме да се потпреме на сите расположливи сили и фудбалерите кои имаат квалитет мора да помогнат и со настапи во репрезентацијата. Секако, доколку тоа го заслужуваат. Верувам дека ги решивме сите такви прашања и се радувам на новите предизвици“, додаде Пандев.
