Македонската фудбалска легенда се наврати на еден неславен настан од нашата фудбалска историја и опиша како му било кога фудбалерите беа поразени од фудбалскиот анонимус Андора.
Горан Пандев направи мега-интервју за порталот MozzartSport.com во кое раскажа многу работи, меѓу кои и тоа како било чувството кога македонската репрезентација го претрпе најголемиот срам во својата историја, поразот на гости кај Андора есента 2004 година.
На 13 октомври пред 18 и пол години Македонија гостуваше кај аутсајдерот Андора во рамките на квалификациите за пласман на Мундијалот 2006 во Германија. На тој натпревар се замина по едно одлично издание против Холандија во Скопје кога Македонија остана непоразена против гигантот играјќи 2:2, а токму Пандев даде еден од головите.
А таму, високо на Пиринеите, на малиот стадион „Ајшоваљ“ во градот Андора Ла Веља, наместо сигурна победа Македонија загуби со 1:0 благодарение на голот на Марк Бернаус на половина час пред крајот.
Пандев тогаш настапуваше за Лацио, беше еден од најдобрите играчи, а тренер му беше познатиот Делио Роси. Воопште не му било лесно да се врати во клубот по една таква бламажа.
„Загубивме од Андора, ми беше срам да се вратам во Лацио после таков пораз. Играш нерешено со Холандија и потоа губиш од аматерите од Андора?! Тоа може само нам да ни се случи... Се враќам во Рим и месец дена не можам да се составам после тоа, а Делио Роси ми се дере и ме прашува што ми е. Ми велеше да се откажам од репрезентацијата бидејќи и онака вечно бевме петти во група. Но, за мене репрезентацијата е светост“.
Пандев сепак подоцна се откажа од репрезентацијата, во годините 2014 и 2015 воопшто не играше, а се врати во 2016 кога тогаш новоназначениот селектор Игор Ангеловски го убеди повторно да го облече дресот со националните бои.
„Потоа кога Ангеловски дојде за селектор се промени и менталитетот на играчите. А, Лигата на нации им олесни на помалите земји како Македонија“, додаде Пандев.
