Пандев - најдобар екс-ју стрелец во Серија А, брка и балкански рекорд

Двата гола во саботата го направија Горан Пандев најдобар стрелец од поранешна Југославија во Калчото, а само 7 голови до делат и до приматот најдобар Балканец.

Пандев не само што го сруши својот поранешен клуб Наполи, не само што ѝ донесе победа и огромни три бода на Џеноа во борбата за опстанок, туку и сруши еден рекорд.

И тоа не било каков рекорд, туку нашиот Горан стана најдобар стрелец во Серија А од сите фудбалери кои доаѓаат од просторите на поранешна Југославија, рачунајќи ги и оние кои настапувале во Италија како Југословени.

Со новите два гола Пандев стигна до бројката од 97 голови во Серија А, за еден гол престигнувајќи го досегашниот екс-ју рекордер, Црногорецот Мирко Вучиниќ.

Најдобри Серија А стрелци од екс-ју:

1. 97 Горан Пандев (Македонија)
2. 96 Мирко Вучиниќ (Црна Гора)
3. 91 Јосип Иличиќ (Словенија)
4. 85 Един Џеко (Босна и Херцеговина)

Проблем за Пандев е тоа што освен Вучиниќ, останатите двајца кои следуваат на табелата, односно Иличиќ и Џеко, се активни фудбалери и тоа прилично добро голгетерски расположени. Доколку и двајцата останат и наредната сезона во Италија, многу е веројатно дека еден од нив ќе го понесе овој примат, но на наше задоволство, додека тоа не се случи, Македонец ќе биде најдобар екс-ју стрелец во Серија А.

Ако веќе стана најдобар од поранешна Југославија, Пандев е многу блиску и до уште поголемо признание - најдобар стрелец во Серија А од цел Балкан. Табелата на стрелци од Балканот не е многу поразлична од онаа за екс-ју, со тоа што тука лидер е Адриан Муту, а на Пандев му недостасуваат само 6 голови за да се израмни со Романецот, или 7 за да стане најдобар балкански стрелец во Калчото.

Најдобри Серија А стрелци од Балканот:

1. 103 Адриан Муту (Романија)
2. 97 Горан Пандев (Македонија)
3. 96 Мирко Вучиниќ (Црна Гора)
4. 91 Јосип Иличиќ (Словенија)
5. 85 Един Џеко (Босна и Херцеговина)

Општо гледано, Пандев веќе е помеѓу најдобрите 100 стрелци во целата историја на најдобрата италијанска лига. Со 97 голови Пандев е на делба на 98. место заедно со Дрис Мертенс од Наполи и Велшанецот Џон Чарлс кој ги тресел мрежите кон крајот 50-тите и почетокот на 60-тите години од минатиот век. Недостижен на врвот е легендарниот Силвио Пиола со 290 голови, додека од активните најдобар е Фабио Куаљарела со 171 гол.

1. 290 Силвио Пиола (Италија)
2. 262 Џузепе Меаца (Италија)
3. 250 Франческо Тоти (Италија)
4. 225 Гунар Нордал (Шведска)
5. 216 Жозе Алтафини (Бразил/Италија)

Од играчите кои моментално играат во Калчото нашиот Горан го дели 4. место, но тие позади него се многу блиску, додека за во топ 3 е невозможно да влезе.

Најдобри активни Серија А стрелци:

1. 171 Фабио Куаљарела (Италија/Сампдорија)
2. 149 Чиро Имобиле (Италија/Лацио)
3. 146 Златан Ибрахимовиќ (Шведска/Милан)
4. 97 Дрис Мертенс (Белгија/Наполи)
5. 97 Горан Пандев (Македонија/Џеноа)
6. 96 Андреа Белоти (Италија/Торино)
7. 91 Јосип Иличиќ (Словенија/Аталанта)
8. 89 Дуван Сапата (Колумбија/Аталанта)
9. 89 Родриго Паласио (Аргентина/Болоња)
10. 86 Пауло Дибала (Аргентина/Јувентус)

Сезонава преостануваат уште 17 кола во Серија А, 17 натпревари шанса за Пандев да го зголеми своето голгетерско салдо, да влезе во Клубот 100, да се зацврсти како најдобар екс-ју стрелец и да стане надојбар стрелец од целиот Балкански Полуостров.

Пандев секогаш напоменува дека нему головите не му се најважни, но нам како навивачи ни се важни и со душа чекаме нов гол на Пандев и рушење на уште некој рекорд.