Капитенот на македонската репрезентација Горан Пандев, даде свое видување за вчерашниот дуел со Австрија кој заврши со победа на противникот со 3:1.
– Одигравме добри осумдесетина минути. Знаевме дека во второто полувреме Австрија ќе притисне. Тие се физички многу помоќни од нас. Имаат добра клупа. Ние имавме некои контри што требаше подобро да ги искористиме, но таков е фудбалот. Примивме несреќен втор гол и мислам дека тогаш натпреварот беше решен, изјави Пандев.
Тој очекува исто така тежок натпревар во второто коло против Украина.
– Сега треба добро да се подготвиме за Украина. Овој натпревар за нас ќе биде одлучувачки. Треба да играме напаѓачки, на сè или ништо, додаде македонскиот капитен.
Пандев им се заблагодари на навивачите кои допатуваа во Букурешт и во текот на целиот натпревар даваа голема поддршка „црвено-жолтите“.
Втор највозрасен стрелец на ЕП
Пандев вчера стана вториот највозрасен стрелец во историјата на Европските првенства. Капитенот на македонската репрезентација, против Австрија се запиша во листата на стрелците на возраст од 37 години и 322 дена.
Прв на оваа листа е Австриецот Ивица Вастиќ, кој постигна гол на возраст од 38 години и 256 дена на 12 јуни 2008 година против Полска.
Во Топ 5 се и: Золтан Геро од Унгарија во 2016 година со 37 години и 61 ден; Гарет Маколи од Северна Ирска во 2016 година со 346 години и 194 дена и Андриј Шевченко од Украина во 2012 година со 35 години и 255 дена.